2Ki 25 | NdeIBE | STEP | Ngomnyaka wesificamunye wokubusa kukaZedekhiya, ngosuku lwetshumi lwenyanga yetshumi, uNebhukhadinezari inkosi yaseBhabhiloni wayafika eJerusalema layo yonke impi yakhe, wayivimbezela; wayakhela imiduli yokuvimbezela inxa zonke.

2 Kings 25

1 Ngomnyaka wesificamunye wokubusa kukaZedekhiya, ngosuku lwetshumi lwenyanga yetshumi, uNebhukhadinezari inkosi yaseBhabhiloni wayafika eJerusalema layo yonke impi yakhe, wayivimbezela; wayakhela imiduli yokuvimbezela inxa zonke. 2 Umuzi wavinjezelwa kwaze kwaba ngumnyaka wetshumi lanye wokubusa kwenkosi uZedekhiya. 3 Ngosuku lwesificamunye lwenyanga yesine indlala yakhula phakathi komuzi, kwakungaselakudla kwabantu elizweni.

4 Basebediliza umduli womuzi, amabutho wonke abaleka ebusuku aphuma ngesango eliphakathi kwemiduli ephansi kwesivande senkosi, lanxa abeBhabhiloni babewuhonqolozele umuzi. Abaleka aqonda e-Arabha.

5 Kodwa amabutho amaBhabhiloni axotshana lenkosi aze ayayibambela emagcekeni aseJerikho. Wonke amabutho enkosi ayesehlakazekile ehlukana layo ekuthunjweni kwayo. 6 Yona yathathwa yasiwa enkosini yaseBhabhiloni eRibhila, lapho eyafika yagwetshelwa khona. 7 Babulala amadodana kaZedekhiya ekhangele. Basebemkhupha amehlo, bambopha ngamaketane ethusi bamusa eBhabhiloni.

8 Ngosuku lwesikhombisa ngenyanga yesihlanu, kungumnyaka wetshumi laficamunye wokubusa kukaNebhukhadinezari inkosi yaseBhabhiloni, uNebhuzaradani umlawuli wamabutho okulinda umndlunkulu, eyisikhulu senkosi yaseBhabhiloni, wafika eJerusalema.

9 Wafika watshisa ithempeli likaJehova, wathungela lesigodlo sesikhosini lezindlu zonke eJerusalema. Loba yiphi indlu eqakathekileyo wayithungela ngomlilo yadilika.

10 Wonke amabutho aseBhabhiloni, ekhokhelwa ngumlawuli wamabutho okulinda umndlunkulu, adiliza imiduli ehonqolozele iJerusalema.

11 UNebhuzaradani umlawuli wabalindi wathutha bonke abantu ababesele emzini, wabaxotshela ezizweni, ndawonye labo bonke abantu lalabo abasebeye enkosini yaseBhabhiloni. 12 Kodwa umlawuli wamabutho watshiya abayanga abavele bengalalutho elizweni ukuze balime amasimu lezivini.

13 AbeBhabhiloni baphahlaza izinsika zethusi lezinti zezibane loLwandle lwethusi, okwakusethempelini lika-Jehova. Bathwalela ithusi lelo eBhabhiloni. 14 Bathatha njalo izimbiza, lamafotsholo, lezindlawu, lezitsha zempepha, lezitsha zonke ezazisetshenziswa.

15 Umlawuli wabalindi besigodlo wathatha izindengezi lemiganu yokuchela, konke okwakwenziwe ngegolide elicengekileyo loba isiliva.

16 Ithusi elalingelezinsika ezimbili, loLwandle olulodwa, lezinti zezibane, konke okwakwenzelwe ithempeli likaJehova nguSolomoni, kwakulesisindo esasingelinganiswe.

17 Ubude bensika nganye babuzingalo ezilitshumi laficamibili ukuya phezulu. Isiduku sethusi ngasinye phezu kwensika sasizingalo ezintathu ukuya phezulu, njalo sasiceciswe ngomeluko lamaphomegranethi ethusi nxazonke. Eyinye insika kanye lomeluko wayo layo yayinjalo.

18 Umlawuli wabalindi wabopha umphristi omkhulu uSeraya, lomlandelayo uZefaniya labalindi bomnyango abathathu. 19 Kulabo ababelokhu bekhona emzini, wathatha isikhulu esasiphethe amadoda okulwa labacebisi besikhosini abahlanu. Wathatha lonobhala oyisikhulu esasiphethe umsebenzi wokubuthwa kwabantu bengeniswa emabuthweni kanye lamadoda angamatshumi ayisithupha ayelawo afunyanwa phakathi komuzi.

20 UNebhuzaradani umlawuli wabathatha bonke wabasa phambi kwenkosi yaseBhabhiloni eRibhila. 21 Khonale eRibhila, elizweni laseHamathi, inkosi yathi kabaqunywe. Ngakho abakoJuda baya ekuthunjweni kude lelizwe labo.

22 UNebhukhadinezari inkosi yase-Bhabhiloni wakhetha uGedaliya indodana ka-Ahikhamu, oyindodana kaShafani, ukuba aphathe abantu ababesele koJuda. 23 Zonke izikhulu zabalawuli bamabutho lamabutho, bonke sebezwile ukuthi inkosi yaseBhabhiloni yayisibeke uGedaliya ukuba nguSibalukhulu, beza kuGedaliya eMizipha izikhulu kungu-Ishmayeli indodana kaNethaniya, uJohanani indodana kaKhareya, uSeraya indodana kaThanihumethi umNethofathi, uJazaniya indodana kaMahakhathi, labantu babo.

24 UGedaliya wafunga wabathembisa lamabutho abo wathi: “Lingesabi izikhulu zaseBhabhiloni. Lina yakhani lihlale elizweni lisebenzele inkosi yase-Bhabhiloni, konke kuzalilungela.”

25 Kodwa ngenyanga yesikhombisa u-Ishmayeli indodana kaNethaniya, indodana ka-Elishama, owayezalwa esikhosini, weza lamadoda alitshumi bafika babulala uGedaliya lamadoda akoJuda kanye laweBhabhiloni ayekade elaye eMizipha. 26 Ngenxa yalokhu, abantu bonke kusukela kubantukazana kusiya kwabaphakemeyo, kanye lezikhulu zamabutho, babalekela eGibhithe ngokwesaba abeBhabhiloni.

Ukukhululwa KukaJehoyakhini

27 Ngomnyaka wamatshumi amathathu lesikhombisa wokuthunjwa kuka-Jehoyakhini inkosi yakoJuda, ngomnyaka u-Avili-Merodakhi aba yinkosi eBhabhiloni, wakhulula uJehoyakhini entolongweni ngosuku lwamatshumi amabili lesikhombisa lwenyanga yetshumi lambili. 28 Wakhuluma kuhle wamnika isihlalo esihloniphekayo ukwedlula lezo ezazingezamakhosi ayekade elawo eBhabhiloni.

29 Ngakho uJehoyakhini wakhupha izigqoko zakhe zentolongweni njalo kusukela lapho empilweni yakhe yonke wadla kuhle etafuleni lenkosi. 30 Izinsuku zonke inkosi yayinika uJehoyakhini isabelo sansuku zonke, empilweni yakhe yonke.